Работилницата за инклузивна е-власт во Сараево беше организирана на 13 декември и се одржа во просториите на Алумни центарот за постдипломски студии (АЦИПС). За жал, немаше доволен одѕив од поканетите странки, и имаше мал број на присутни.

 

На работилницата присуствуваа претставници од Министерството за транспорт и врски на БиХ, иницијативата еСЕЕ, Министерството за внатрешни работи на кантонот Сараево, неколку НВОи и Теледомови - НВО ориентирана кон бизнис. Претставници на партнерските организации од Македонија (4-члена делегација), Србија и Црна Гора исто така учествуваа на работилницата. Работилницата ја отвори Валентина Пелицер, извршна директорка на Еден Свет – Платформа за Југоисточна Европа и Сањин Бужо, координатор во истата организација.

г. Филип Стојановски од фондацијата Метаморфозис го претстави проектот „Мрежа за инклузивна е-власт во Западен Балкан“. Потоа следеа презентации од истражувања за е-власт во регионот. Од Србија, Наташа Радовиќ го презентираше истражувањето на Белградската Отворена Школа, Дејан Спасов од Институтот за информатика во Скопје, Војин Голубовиќ од Институтот за стратешки студии и прогнози во Подгорица и Сањин Бужо од Еден свет – платформа за Југоисточна Европа во Сараево.
Во продолжение следеа презентациите за проектот Ви-Го на Климент Кочовски, и презентација на “е-предизвици во БиХ“ од Валентина Пелицер. По презентациите, започнавме со дискусија за презентациите и нивото на развиеност на е-услугите на Балканот.

Конечно, работилницата продолжи со дискусија за предизвиците со кои се соочува развојот на е-услугите во БиХ и потребните чекори за подобрување на состојбата во БиХ. Главни теми на дискусија беа: Развојна стратегија и нејзината имплементација, политичка волја за подобрување на е-услугите, финансиски ресурси, ефекти од регионалните иницијативи, аспекти на инклузија, образование итн. На крајот, работилницата резултираше со следните заклучоци:

•    Потребно е да се спроведе истражување на сите институционални нивоа во БиХ
•    Потребна е анализа на постоечките документи и стратегија
•    Измени на документите
•    Подготвување на список на приоритети
•    Систематски пристап при решавањето на проблеми. (примери за примена на успешна пракса)
•    Имплементацијата на ИКТ стандарди мора да се земе предвид при развивањето на е-услугите
•    Потребна е едукација на медиумите, граѓаните и руралните области
•    Подобрување на интернет пенетрацијата

Во однос на наредните активности, главниот фокус ќе биде на спроведувањето на истражувањето на сите институционални нивоа во БиХ и соработката со Министерството за комуникации на БиХ кое е одговорно за имплементација на стратегијата за развој на е-услуги во БиХ.